Silk Avia yangi ATR 72-600 havo kemasini kutib oldi
Bugun, 16-fevral kuni Uzbekistan Airways tarkibiga kiruvchi Silk Avia to‘rtinchi ATR 72-600 havo kemasini tijorat maqsadlarida foydalanish uchun qabul qilib oldi.
Havo kemasi Airbus konsernining Tuluzadagi (Fransiya) zavodi aerodromida barcha zarur texnik hamda parvoz sinovlaridan o‘tdi va soat 15:00 da Toshkentga qo‘ndi. An’anaga ko‘ra, avialayner suv arkasi bilan tantanali ravishda kutib olindi. Toshkent aeroportida yangi havo kemasini OAV vakillari va Uzbekistan Airways rahbariyati kutib oldi.
To‘g‘ridan-to‘g‘ri zavoddan kelgan kema hali ham soddalashtirilgan fuzelyaj rangi – butunlay oq rangda. Kelgusida “Uzbekistan Airways Technics” angarlaridan birida milliy Xon-atlas tasviridagi anʼanaviy livreyani chizish rejalashtirilgan.
ATR 72-600 avialaynerining maksimal og‘irligi 22 800 kgni tashkil etadi, 1528 kmgacha parvozni amalga oshirishi mumkin. Yangi havo kemasi allaqachon parvozlar jadvaliga kiritilgan. U oʻzining ilk parvozini mahalliy yoʻnalish boʻyicha amalga oshiradi.
“Uzbekistan Airways aviakompaniyasi tarkibiga kiruvchi Silk Avia o‘z oldiga ulkan maqsadlarni qo‘ydi: mamlakatimiz ichida amalga oshiriladigan parvozlarda yetakchi bo‘lish, doimiy ravishda yo‘nalishlar tarmog‘ini kengaytirib borish va aviaqatnovlar sonini ko‘paytirish shular jumlasidandir. Qolaversa, umumiy maqsadimiz, Yangi O‘zbekistonning maqsadi – Respublika bo‘ylab aviaqatnovlar sonini oshirish va ichki turizmni rivojlantirish uchun shart-sharoit yaratishdir. Bunga esa mamlakatimiz shaharlari o‘rtasidagi aviatsiya aloqalarini tiklagan holda, turbovintli ATR brendi ostidagi havo kemalari shubhasiz katta yordam beradi”, – dedi Uzbekistan Airways” AJ Boshqaruv raisi Shuxrat Xudaykulov.
Silk Avia aviaparki 72 tagacha yoʻlovchini sigʻdira oladigan toʻrtta ATR 72-600 mintaqaviy yoʻlovchi tashuvchi havo kemalarini oʻz ichiga oladi. Ayni paytda Silk Avia O‘zbekistonning Toshkent, Buxoro, Qarshi, Navoiy, Namangan, Samarqand, Termiz, Farg‘ona va Urganch shaharlarini bir-biri bilan bog‘lab kelmoqda.