O‘zbekiston aeroportlari “Silk Avia” aviakompaniyasining ilk parvozlarini tantanali kutib oldi
Gullar, milliy raqslar, karnay va surnay sadolari ostida Buxoro, Samarqand, Urganch, Qarshi, Namangan aeroportlarida Silk Avia mintaqaviy aviakompaniyasining ilk reyslari va ilk yo‘lovchilarini kutib olmoqda.
«Ushbu aviatashuvchining tashkil etilishi nafaqat turizmni rivojlantirish va ishbilarmonlik faolligini rag‘batlantirish, balki hududiy aeroportlarni rivojlantirish uchun ham muhim qadamdir. Urganchdan va ungacha bo'lgan yo'nalishlar bo'yicha “yuklanish” 100%. Shahrimizni boshqa sayyohlik markazlari — Samarqand va Buxoro bilan bog‘lovchi reyslar juda kam edi. Sayyohlar mashina yoki avtobusda sayohat qilishlari kerak edi, bu har doim ham qulay emas. Endi sayyohlar, ayniqsa, turoperatorlar bir shahardan ikkinchi shaharga o‘rtacha bir soat ichida yetib borish imkoniga ega bo‘lganidan juda xursand», — deya sharhladi Urganch aeroporti direktori Sunnatilla G‘aipov.
«Viloyatimiz aholi zichligi bo‘yicha yetakchi bo‘lgani uchun harakatchanlik ham ancha yuqori. Ob-havo har doim ham rejalarimizni hisobga olmaydi — dovon orqali Farg‘ona vodiysiga borish juda qiyin. Shaharlarimiz bilan barqaror havo aloqasi shunchaki zarur. Endi Silk Avia haftasiga to‘rt marta — chorshanba va juma kunlari parvoz qiladi. Shu bilan birga, jadval juda qulay tuzilgan bo‘lib, odamlarga o‘z vaqtini tejash — ertalab Namanganga uchib, kechki payt Toshkentga qaytish imkonini beradi», — dedi Namangan aeroporti direktori Qobiljon Abdunazarov.
«Navoiy aeroporti, ehtimol, eng baxtlisi. Bir necha yillardan buyon poytaxt bilan Navoiy o‘rtasida havo orqali yo‘lovchi qatnovi umuman yo‘q edi. Odamlar Toshkentga poyezdda borishlari kerak edi. Ba'zan chiptalar yetishmasdi. Navoiy shahri va viloyatida ko‘plab yirik korxonalar faoliyat ko‘rsatmoqda, Toshkent shahrida istiqomat qiluvchi va dam olish kunlarida oila a’zolarini borib, uyda hordiq chiqarishni hohlovchi xodimlar bor. Ayniqsa, buning uchun qulay jadval ishlab chiqildi — shanba kuni ertalab ikkita reys va yakshanba kuni kechqurun ikkita reys», — dedi Navoiy aeroporti direktori Shodibek Qo‘chqorov.
Eslatib o'tamiz, 25-apreldan Silk Avia O'zbekiston shaharlariga parvozlarni amalga oshira boshladi. Parvozlarning ochilish marosimida taʼkidlanganidek, aviatashuvchi oʻzini nafaqat poytaxtni hududlar bilan, balki hududlarni ham oʻzaro bogʻlovchi birinchi mintaqaviy loukoster aviakompaniya sifatida namoyon etmoqda.
